Metforminin uzunmüddətli istifadəsinin vitamin B12 səviyyəsinə təsiri araşdırılıb.

Müasir tibb elminin əsas istiqamətlərindən biri geniş istifadə olunan farmakoloji preparatların yalnız terapevtik effektivliyinin deyil, eyni zamanda onların uzunmüddətli metabolik təsirlərinin kompleks şəkildə araşdırılmasıdır. Bu baxımdan Respublika Endokrinoloji Mərkəzində aparılan tədqiqat klinik praktikada geniş tətbiq edilən antidiabetik preparat — metforminin qanda vitamin B12 səviyyəsinə təsirinin qiymətləndirilməsinə həsr olunub.
Metformin antihiperqlisemik təsiri, insulinə həssaslığı artırması və metabolik göstəricilərə müsbət təsiri ilə çoxsaylı klinik və epidemioloji tədqiqatlarda öz effektivliyini təsdiq edib. Bu səbəbdən preparat diabetin müasir müalicə protokollarında əsas yer tutur və milyonlarla pasiyent tərəfindən uzunmüddətli istifadə olunan dərman vasitələrindən biri hesab olunur.
Vitamin B12 hematopoetik sistemin normal fəaliyyəti, nuklein turşularının sintezi və sinir sisteminin funksional bütövlüyünün qorunması baxımından mühüm əhəmiyyət kəsb edir. Onun çatışmazlığı meqaloblast anemiya, periferik neyropatiya və müxtəlif nevroloji pozğunluqlarla müşayiət oluna bilər.
Tədqiqatın əsas məqsədi metformin qəbul edən pasiyentlərdə qanda vitamin B12 səviyyəsinin dinamikasını qiymətləndirmək, preparatın istifadə müddəti ilə bu göstərici arasında mümkün əlaqələri müəyyən etmək və nəticələrin klinik praktikada tətbiq perspektivlərini araşdırmaq olub.
Əldə olunan nəticələrə əsasən, metforminin uzunmüddətli istifadəsi bəzi hallarda vitamin B12 səviyyəsinin azalması ilə əlaqələndirilir. Bu nəticələr beynəlxalq elmi ədəbiyyatla ümumi tendensiya baxımından uyğunluq təşkil edir.
Tədqiqatın nəticələri Sumqayıt Tibb Mərkəzinin (STM) 2 nömrəli Şəhər Xəstəxanasında keçirilən elmi tədbir zamanı həkim-endokrinoloqlara təqdim olunub. Tədbirdə Respublika Endokrinoloji Mərkəzinin direktoru Kəmalə Ağayeva və Poliklinika şöbəsinin müdiri Dinar Qəhrəmanova iştirak ediblər.
Tədbiri giriş sözü ilə açan STM-nin direktor müavini Ramin Qasımov çıxışında bu cür elmi tədbirlərin səhiyyə işçilərinin peşəkar inkişafında, müasir tibbi biliklərin paylaşılmasında və klinik təcrübənin zənginləşdirilməsində mühüm rol oynadığını vurğulayıb.
Daha sonra Respublika Endokrinoloji Mərkəzinin direktoru, t.ü.f.d Kəmalə Ağayeva çıxış edərək B12 vitamini çatışmazlığının müasir tibbdə aktual problemlərdən biri olduğunu diqqətə çatdırıb. O, xəstəliyin erkən mərhələdə aşkar olunmasının ağır fəsadların qarşısının alınmasında mühüm əhəmiyyət daşıdığını, düzgün diaqnostika və müalicə yanaşmalarının pasiyentlərin həyat keyfiyyətinə birbaşa təsir etdiyini bildirib.
Konfrans çərçivəsində mövzu üzrə elmi məruzələr dinlənilib. Həkim-endokrinoloq Dinar Qəhrəmanova B12 vitamini çatışmazlığı ilə bağlı sübutlara əsaslanan yanaşmalar, skrininq nəticələri və gündəlik klinik təcrübə barədə təqdimatla çıxış edib.
STM-nin 2 nömrəli Şəhər Xəstəxanasının həkim-nevroloqu Səkinə Əliyeva isə bel ağrılarının ilkin diaqnostikası və müasir müalicə metodlarına dair məruzə təqdim edib.
Tədbirdə iştirak edən terapevtlər və endokrinoloqlar mövzu ətrafında geniş müzakirələr aparıb, sual-cavab sessiyasında fəallıq nümayiş etdiriblər.
Respublika Endokrinoloji Mərkəzində aparılan elmi fəaliyyətin əsas istiqamətlərindən biri klinik praktikada aktual problemlərin araşdırılması və əldə olunan nəticələrin səhiyyə sistemində tətbiqinə töhfə verməkdir. Bu istiqamətdə müxtəlif elmi layihələr üzrə işlər davam etdirilir və gələcəkdə daha genişmiqyaslı klinik tədqiqatların həyata keçirilməsi planlaşdırılır.
Metforminlə uzunmüddətli müalicə alan pasiyentlərdə vitamin B12 səviyyəsinin mütəmadi monitorinqi potensial çatışmazlığın erkən aşkar olunmasına və profilaktik tədbirlərin vaxtında görülməsinə imkan yaradır.

Bütün xəbərlər